பள்ளி மேலாண்மை குழு எதற்கு? மீண்டும் கூட்டம் நடத்தி புதிய தலைவரை தேர்வு செய்ய கோரிக்கை!

விதிமுறைகள் பின்பற்றப்பட்டதா? பெற்றோர்கள் எதிர்ப்பு... மீண்டும் கூட்டம் நடத்தி புதிய தலைவரை தேர்வு செய்ய கோரிக்கை!

தஞ்சாவூர் மாவட்டம், சேதுபாவாசத்திரம் ஊராட்சி ஒன்றியம், முடச்சிக்காடு ஊராட்சி ஒன்றிய நடுநிலைப் பள்ளியில் கடந்த 26.09.2026 அன்று நடந்த பள்ளி மேலாண்மை குழு கூட்டத்தில் தலைமை ஆசிரியை திருமதி அமிர்தவள்ளி அவர்கள் அவர்களே தன்னிச்சையாக ஒருவரை குழு தலைவராக அறிவித்தது தொடர்பாக அங்கு சற்று சலசலப்பு ஏற்பட்டது.

ஒரு பள்ளியின் வளர்ச்சியில் ஆசிரியர்களுக்கு எவ்வளவு முக்கியத்துவம் இருக்கிறதோ, அதே அளவுக்கு பெற்றோர்களின் பங்களிப்பும் முக்கியமானது. அதற்காகவே பள்ளிகளில் பள்ளி மேலாண்மை குழு போன்ற அமைப்புகள் உருவாக்கப்பட்டுள்ளன.

ஆனால், அந்தக் குழுவின் தலைவரை தேர்வு செய்வதிலேயே விதிமுறைகள் பின்பற்றப்படவில்லை என்ற குற்றச்சாட்டு எழுந்தால்?

அதுவும் பெற்றோர்களின் கருத்தை புறக்கணித்து பள்ளி தலைமை ஆசிரியை தன்னிச்சையாக ஒருவரை தலைவராக தேர்வு செய்ததாக கூறப்பட்டால்?

இதுதான் தற்போது தஞ்சாவூர் மாவட்டம், சேதுபாவாசத்திரம் ஊராட்சி ஒன்றியம், முடச்சிக்காடு ஊராட்சி ஒன்றிய நடுநிலைப் பள்ளியில் எழுந்துள்ள சர்ச்சையின் மையப்புள்ளி.

“தலைவரை தேர்வு செய்வது யார்?”

பள்ளி மேலாண்மை குழு என்பது பள்ளி தலைமை ஆசிரியரின் தனிப்பட்ட அமைப்பு அல்ல.

பெற்றோர்கள், ஆசிரியர்கள் மற்றும் பள்ளியுடன் தொடர்புடைய சமூக பிரதிநிதிகளின் பங்களிப்புடன் பள்ளியின் வளர்ச்சி மற்றும் மாணவர்களின் நலனை முன்னிலைப்படுத்தி செயல்பட வேண்டிய அமைப்பு.

அப்படியிருக்கையில், அந்தக் குழுவின் தலைவரை முறையான கூட்டம் மற்றும் விதிமுறைகளின் அடிப்படையில் தேர்வு செய்யாமல், பள்ளி தலைமை ஆசிரியை தன்னிச்சையாக தேர்வு செய்ததாக பெற்றோர்கள் தரப்பில் குற்றச்சாட்டு எழுந்துள்ளது.

பெற்றோர்கள் ஏன் எதிர்ப்பு தெரிவித்தனர்?

குழுவின் தலைவர் தேர்வு தொடர்பான நடைமுறையில் வெளிப்படைத்தன்மை இல்லை என்றும், தங்களுடைய கருத்துக்கு உரிய முக்கியத்துவம் வழங்கப்படவில்லை என்றும் சில பெற்றோர்கள் எதிர்ப்பு தெரிவித்ததாக கூறப்படுகிறது.

ஒருவரை முன்கூட்டியே முடிவு செய்து, பின்னர் கூட்டத்தின் மூலம் அதை உறுதி செய்வது போன்ற நாடகமே கூட்டத்தில் அரங்கேறியுள்ளது.

பள்ளி மேலாண்மை குழுவின் அடிப்படை நோக்கமே பெற்றோர்களின் பங்கேற்பை உறுதி செய்வதாகும். பெற்றோர்களின் பங்கேற்பே இல்லாமல் அவர்களின் கருத்து முறையாக பதிவு செய்யப்படாமல் ஒரு தலைவர் தேர்வு செய்யப்பட்டதால் அந்தத் தேர்வின் நடைமுறை குறித்து கேள்வி எழுகிறது.

பெற்றோர்களில் மூன்று பெண்களுக்கும் மேலாக தலைவர் பதவிக்கு போட்டியிட தயாராக இருந்த போதிலும் அவர்களுக்கான வாய்ப்பு முற்றிலும் கூட்டத்தில் மறுக்கப்பட்டுள்ளது. இதன் காரணமாகவே பெற்றோர்கள் மத்தியில் எதிர்ப்புகள் கிளம்பி உள்ளது.

“நான் முடிவு செய்துவிட்டேன்...” – இப்படியா நிர்வாகம்?

ஒரு பள்ளியின் தலைமை ஆசிரியருக்கு பல நிர்வாகப் பொறுப்புகள் உள்ளன.

ஆனால் ஒவ்வொரு நிர்வாக முடிவும் தனிப்பட்ட விருப்பத்தின் அடிப்படையில் எடுக்கப்பட முடியாது. குறிப்பாக, பள்ளி மேலாண்மை குழு போன்ற அமைப்புகளில் விதிமுறை, வெளிப்படைத்தன்மை மற்றும் பெற்றோர் பங்கேற்பு மிகவும் முக்கியமானவை.

“யார் தலைவர் என்பதை நானே முடிவு செய்து விட்டேன்” என்ற அணுகுமுறை இருந்ததாக பெற்றோர்கள் குற்றம் சாட்டுவது 

“பள்ளி மேலாண்மை குழுவில் பெற்றோர்களின் குரல் எங்கே?”

என்ற கேள்வியையும் அது எழுப்புகிறது.

நடவடிக்கை எடுக்கப்படுமா? - மீண்டும் கூட்டம் நடத்தப்படுமா? 

பள்ளி மேலாண்மை குழு தலைவர் தேர்வில் விதிமுறைகள் பின்பற்றப்படவில்லை என்ற பெற்றோர்களின் குற்றச்சாட்டு உண்மையென நிரூபிக்கப்பட்டால், அந்த நடைமுறையை மறுபரிசீலனை செய்வது அவசியமாகும். ஒரு பள்ளியில் பெற்றோர்கள் மற்றும் பள்ளி நிர்வாகத்திற்கு இடையே கருத்து வேறுபாடு உருவாகும்போது, அது நீண்டகால பிரச்சினையாக மாறுவதற்கு முன்பே கல்வித்துறை தலையிட்டு உண்மை நிலையை கண்டறிய வேண்டும்.

இதற்காக சம்பந்தப்பட்ட கல்வித்துறை அதிகாரிகள் புகாரினை தீர விசாரணை செய்து விதிமுறைகள் மீறப்பட்டிருந்தால், முறையான நடைமுறையில் மீண்டும் கூட்டம் நடத்த நடவடிக்கை எடுக்க வேண்டும். அனைத்து தகுதியான உறுப்பினர்களின் பங்கேற்புடன் புதிய தலைவரை தேர்வு செய்ய வேண்டும். இதன் மூலம் மட்டுமே இந்த விவகாரத்தில் நிலவும் சர்ச்சைக்கு முற்றுப்புள்ளி வைக்க முடியும்.

மேலும், குறிப்பிட்ட சம்பவம் குறித்து குருவிக்கரம்பை வட்டார கல்வி அலுவலரிடம் கேள்வி எழுப்பிய போது "சம்பவம் குறித்து எழுத்துப் பூர்வமான புகார் மனுக்கள் வரும் பொழுது விசாரணை செய்து உரிய நடவடிக்கை எடுக்கப்படும்" என தெரிவித்தார். எனவே சம்பந்தப்பட்ட கல்வித்துறை அதிகாரிகள் இந்த விவகாரத்தில் வெளிப்படையான விசாரணை நடத்த வேண்டும் மற்றும் சம்பந்தப்பட்ட நபர்களின் மீது நடவடிக்கை எடுக்கப்பட வேண்டும் என்பதே பெற்றோர்களின் எதிர்பார்ப்பாக உள்ளது...

எங்களுக்கா நீங்கள் எல்லாம் ஓட்டு போட்டீங்க... அரசு கொறடா கேள்வி!

 

தமிழ்நாட்டில் கடந்த 2026 ஆம் ஆண்டு நடைபெற்று முடிந்த சட்டமன்ற பொது தேர்தலில் போட்டியிட்டு அதிக எண்ணிக்கையிலான இடங்களில் வெற்றி பெற்று காங்கிரஸ் கட்சி, இடதுசாரிகள் மற்றும் விடுதலை சிறுத்தைகள் கட்சிகளின் ஆதரவுடன் தமிழக வெற்றிக் கழகம் ஆட்சிக் கட்டிலில் அமர்ந்துள்ளது.

இந்நிலையில் தமிழ்நாடு அரசின் கொறடாவாக மிகவும் இளம் வயதான (30) தனது நீண்ட நாள் வாகன ஓட்டுநரின் மகனாகிய விருகம்பாக்கம் தொகுதி சட்டமன்ற உறுப்பினர் திரு ரா.சபரிநாதன் அவர்களை நியமித்தார் தமிழ்நாடு முதலமைச்சர் திரு ச.ஜோசப் விஜய் அவர்கள்.

தற்போது சென்னையில் வசித்து வந்தாலும் திரு சபரிநாதன் அவர்களின் பூர்வீகம் புதுக்கோட்டை மாவட்டம், அறந்தாங்கி வட்டம், வேம்பங்குடி கிராமத்தை சேர்ந்தவர் ஆவார்.

இன்று 17.09.2026, காலை 9 மணி அளவில் பேராவூரணி அருகே மருங்கப்பள்ளம் கிராமத்தில் அமைந்துள்ள மிகவும் பிரபலமான ஸ்ரீ மருந்தீஸ்வரர் ஆலயத்திற்கு வருகை தந்து வழிபாடு செய்தார். அப்போது அவர்களுக்கு ஆலய நிர்வாகிகள் தரப்பில் பூரண மரியாதை கொடுக்கப்பட்டது.

வழிபாடு முடிந்த பிறகு மருங்கப்பள்ளம் கிராம மக்கள் அரசு கொறடா என்ற முறையில் அரசின் நேரடி கவனத்திற்கு கொண்டு செல்லும் நோக்கில் மருங்கப்பள்ளம் கிராமத்தில் இருக்கும் அடிப்படை வசதிகள் தொடர்பான கோரிக்கைகளை கூறினர் அதற்கு பதிலளித்த அரசு கொறடா திரு ரா.சபரிநாதன் அவர்கள் " நீங்கள் எல்லாம் எங்களுக்கா ஓட்டு போட்டீங்க... இதெல்லாம் கேட்குறீங்க..." என கூற இதனை சற்றும் எதிர்பார்க்காத அப்பகுதி மக்கள் முகம் சுருங்கி போனார்கள். 

பேராவூரணி சட்டமன்றத் தொகுதியில் தமிழக வெற்றிக் கழகத்தின் சார்பில் திரு சந்திர காண்டீபன் அவர்கள் தேர்தலில் போட்டியிட்டார். ஆனால், திராவிட முன்னேற்றக் கழகத்தை சேர்ந்த திரு நா.அசோக்குமார் அவர்கள் சட்டமன்ற தேர்தலில் போட்டியிட்டு வெற்றி பெற்றார் என்பது குறிப்பிடத்தக்கது.

மக்கள் வாக்களித்தாலும் வாக்களிக்கவில்லை என்றாலும் இன்றைய நிலையில் இவர்கள் தானே அரசு என்றும் கோரிக்கை வைத்தால் இப்படி முகத்தில் அடித்த படி பேசுகின்றாரே என்றும் அனுபவம் இல்லாததால் இவ்வாறு நடந்து கொள்கிறார்கள் என்று சிலரும் முனு முனுத்து சென்றனர் அப்பகுதி மக்கள்.