தஞ்சையில் கைது நடைமுறையில் அலட்சியம் காட்டிய CBCID | கொட்டு வைத்த உயர்நீதிமன்றம்...

 

"காவல் ஆய்வாளரின் கைது சட்டவிரோதம்!" - சிபிசிஐடி-க்கு சென்னை உயர்நீதிமன்ற மதுரை கிளை அதிரடி உத்தரவு

தஞ்சாவூர் மாவட்ட குற்றப்பிரிவு காவல் ஆய்வாளர் சுகுமாரன் கைது செய்யப்பட்டது சட்டவிரோதம் என்றும், அவரை உடனடியாக எவ்வித நிபந்தனையுமின்றி விடுதலை செய்ய வேண்டும் என்றும் சென்னை உயர்நீதிமன்ற மதுரை கிளை உத்தரவிட்டுள்ளது.

வழக்கின் பின்னணி:

தஞ்சாவூரில் உள்ள "ஏ டு இசட் ஸ்பெஷாலிட்டி மருத்துவமனை" (A to Z Speciality Hospital) கூட்டாளர்களான சரவணன் மற்றும் ஜெயஸ்ரீ ஆகியோருக்கு இடையே எழுந்த தொழில்துறை தகராறில், திருமாரன் என்பவர் கொடுத்த புகாரின் அடிப்படையில் காவல் ஆய்வாளர் சுகுமாரன் வழக்குப்பதிவு செய்து விசாரித்து வந்தார்.

இந்த விசாரணை ஒருதலைப்பட்சமாக இருப்பதாகக் கூறி, சட்டம்-ஒழுங்கு டிஜிபி உத்தரவின் பேரில் வழக்கு சிபிசிஐடி-க்கு (CB-CID) மாற்றப்பட்டது. அதன் பின், தொழிலதிபர் சரவணன் அளித்த வாக்குமூலத்தின் அடிப்படையில், காவல் ஆய்வாளர் சுகுமாரன் கட்டப்பஞ்சாயத்து செய்து ரூ.5 கோடி பறித்ததாகக் குற்றம் சாட்டப்பட்டு, சிபிசிஐடி அதிகாரிகளால் கைது செய்யப்பட்டு சிறையில் அடைக்கப்பட்டார்.

உயர்நீதிமன்றத்தில் ஆட்கொணர்வு மனு:

தங்கள் கணவரின் கைது நடவடிக்கை சட்டவிரோதமானது என அறிவிக்கக் கோரி சுகுமாரனின் மனைவி இன்னிசை உயர்நீதிமன்ற மதுரை கிளையில் ஆட்கொணர்வு மனு தாக்கல் செய்தார். இந்த மனுவை நீதிபதிகள் ஜி.ஆர்.சுவாமிநாதன் மற்றும் டாக்டர் பி.முருகன் அடங்கிய அமர்வு விசாரித்தது.

வழக்கு விசாரணையில் நீதிபதிகள் அரசுக்கு சரமாரியான கேள்விகளை அடுக்கி, பின்னர் கைது நடைமுறையில் காவல் துறையின் அலட்சியம் மற்றும் சட்ட நடைமுறைகளை சரியாக பின்பற்றாத காரணத்தால் காவல் ஆய்வாளர் சுகுமாறன் அவர்களின் கைது சட்ட விரோதம் என கூறி அவரை உடனடியாக சிறையில் இருந்து விடுவிக்க வேண்டும் என்று நீதிபதிகள் உத்தரவு பிறப்பித்தனர்.

அதற்கான காரணங்களாக நீதியரசர்கள் குறிப்பிட்டவை

1. பாரதிய நாகரிக் சுரக்ஷா சன்ஹிதா (BNSS) சட்டப்பிரிவு 35(3)-ன் கீழ் வழங்கப்பட்ட நோட்டீஸை ஏற்று, காவல் ஆய்வாளர் சுகுமாரன் சிபிசிஐடி விசாரணைக்கு நேரில் ஆஜராகி ஒத்துழைத்துள்ளார். அவ்வாறு விசாரணைக்கு ஒத்துழைக்கும் ஒருவரைக் கைது செய்ய வேண்டுமானால், அதற்கான வலுவான காரணங்களை விசாரணை அதிகாரி எழுத்துப்பூர்வமாகப் பதிவு செய்ய வேண்டும். ஆனால், சிபிசிஐடி தரப்பில் அத்தகைய எந்தவொரு பதிவும் மேற்கொள்ளப்படவில்லை.
2. இந்திய அரசியலமைப்புச் சட்டம் பிரிவு 22(1)-ன் படி கைது செய்யப்படும் நபருக்கு அதற்கான காரணங்களை உடனடியாகத் தெரிவிக்க வேண்டியது கட்டாயமாகும். ஆனால், சுகுமாரனுக்குக் கைதுக்கான காரணங்கள் வழங்கப்படவில்லை.
3. மாஜிஸ்திரேட் நீதிமன்றத்தில் கைது காரணங்கள் வழங்கப்படாதது சுட்டிக்காட்டப்பட்டபோது, "கைது செய்யப்பட்டவர் காவல் ஆய்வாளர் என்பதால் அவருக்கும், அவரது மனைவி வழக்கறிஞர் என்பதால் அவருக்கும் இதற்கான காரணம் தெரிந்திருக்கும்" எனக் கூறி நிராகரிக்கப்பட்டதை உயர்நீதிமன்றம் கண்டித்துள்ளது. அரசியலமைப்புச் சட்டம் வழங்கும் அடிப்படை உரிமைகளில் இதுபோன்ற சாக்குப்போக்குகளை ஏற்றுக்கொள்ள முடியாது என நீதிபதிகள் தெளிவுபடுத்தினர்.

நீதியரசர்கள் குறிப்பிட்ட காரணங்கள் அனைத்தும் ஒரு கைது நடவடிக்கையில் கட்டாயம் கடைபிடிக்க வேண்டிய முக்கிய நடைமுறைகள் ஆகும். இதனை கூட சரிவர செய்யாமல் நீதிமன்றத்தில் சென்று கொட்டு வாங்கியுள்ளது காவல்துறை...

பிரதமர் நரேந்திர மோடிக்கு பில்லி சூனியம் - அடையாளம் தெரியாத நபர் மீது வழக்கு பதிவு

 

இந்திய பிரதமர் நரேந்திர மோடிக்கு " பில்லி சூனியம் " வைத்த நபரை தேடும் உத்தரப் பிரதேச காவல் துறை :

உத்தரப் பிரதேசம்:

உத்தரப் பிரதேச மாநிலம் தோரிகாட் பகுதியில் உள்ள மயானத்திற்கு அருகே, பிரதமர் நரேந்திர மோடியின் புகைப்படத்தைப் பயன்படுத்தி ‘பில்லி சூனியம்’ அல்லது துர்சடங்குகள் செய்வது போன்ற வீடியோ சமூக வலைதளங்களில் வைரலாகி வருகிறது. இது தொடர்பாக அடையாளம் தெரியாத நபருக்கு எதிராக வழக்குப் பதிவு செய்யப்பட்டு விசாரணை தொடங்கப்பட்டுள்ளதாக அதிகாரிகள் சனிக்கிழமை தெரிவித்தனர்.

காவல் துறையின் கூற்றுப்படி, சமூக வலைதளங்களில் பரவி வரும் அந்த வீடியோவில், தோரிகாட் காவல் எல்லைக்குட்பட்ட சரயு நதிக்கரையில் பிரதமர் நரேந்திர மோடியின் புகைப்படம் வைக்கப்பட்டுள்ளது. அதைச் சுற்றி தேங்காய், எலுமிச்சம்பழங்கள் மற்றும் ஆரஞ்சு நிறப் பொடி உள்ளிட்ட சடங்குப் பொருட்கள் சுற்றி வைக்கப்பட்டுள்ளன.

இச்சம்பவம் குறித்துத் தெரியவந்ததும், அடையாளம் தெரியாத நபர் மீது வழக்குப் பதிவு செய்த காவல்துறை தீவிர விசாரணையில் இறங்கியுள்ளது. வீடியோ எங்கிருந்து முதன்முதலில் பதிவேற்றப்பட்டது என்பதை சைபர் செல்லின் உதவியுடன் போலீசார் ஆய்வு செய்து வருவதுடன், சம்பவம் நடந்த இடத்திலிருந்தும் தடயங்களைச் சேகரித்து வருகின்றனர்.

இது குறித்து கோசி வட்டக் காவல் அதிகாரி சத்யேந்திர பூஷன் திவாரி கூறுகையில், "பாரதிய நியாய சன்ஹிதா (BNS) சட்டத்தின் தொடர்புடைய பிரிவுகளின் கீழ் அடையாளம் தெரியாத நபருக்கு எதிராக தோரிகாட் காவல்துறை சனிக்கிழமை FIR பதிவு செய்துள்ளது" என்றார்.

மேலும், அப்பகுதியில் உள்ள சிசிடிவி காட்சிப் பதிவுகளை ஆய்வு செய்வதன் மூலமும் விசாரணை முடுக்கிவிடப்பட்டுள்ளதாக அவர் குறிப்பிட்டார்.

பிரதமரின் புகைப்படத்தையும், சடங்குப் பொருட்களையும் ஆற்றங்கரையில் வைத்தது யார்? மற்றும் இந்த வீடியோவை சமூக வலைதளங்களில் பரப்பியதன் பின்னணியில் உள்ள நோக்கம் என்ன? என்பது குறித்தும் தீவிரமாக விசாரித்து வருவதாகக் காவல் அதிகாரி மேலும் தெரிவித்தார்.

சதய விழாவில், சாதிய அமைப்புகளுக்கு செக் வைத்த தஞ்சை மாவட்ட SP

ராஜராஜ சோழன் சதய விழா: தஞ்சையில் பேனர்,

போஸ்டர்களுக்கு கட்டுப்பாடு

தஞ்சாவூர்:

மாமன்னன் ராஜராஜ சோழனின் 1,041-வது சதய விழா தஞ்சாவூரில் வரும் அக்.21, 22 ஆகிய தேதிகளில் நடைபெற உள்ள நிலையில், விழாவையொட்டி நகரில் பேனர்கள் மற்றும் போஸ்டர்கள் வைப்பதற்கு காவல்துறை கட்டுப்பாடுகளை அறிவித்துள்ளது.

கடந்த சில ஆண்டுகளாக மாமன்னர் ராஜராஜ சோழனின் சதய விழாவின் போது பல்வேறு சாதிய அமைப்புகளும் ராஜராஜ சோழன் எங்கள் சமுதாயத்தை சேர்ந்தவர் என பிளக்ஸ் பேனர்கள் வைத்து சொந்தம் கொண்டாடி வந்தனர். மேலும், குறிப்பிட்ட சில பேனர்கள் மிகப்பெரிய சட்டம் ஒழுங்கு பிரச்சினை ஏற்படும் அளவிற்கு கூட வைக்கப்பட்டு இருந்தன.

ஒவ்வொரு ஆண்டும் குறிப்பிட்ட பிரச்சினையை எவ்வாறு கையாள்வது என்பதே ஒரு பிரச்சினையாக காவல் துறையினருக்கு இருந்து வந்தது.

ஆனால், அதெற்கெல்லாம் முடிவு கட்டும் வகையில் தற்போதைய தஞ்சாவூர் மாவட்ட காவல் கண்காணிப்பாளர் திரு சுந்தரவதனம் இ.கா.ப அவர்கள் ஒரு பத்திரிகையாளர் சந்திப்பின் மூலம் அனைத்து சாதிய அமைப்புகளுக்கும் செக் வைத்துள்ளார்.

சதய விழாவையொட்டி தஞ்சாவூர் மாநகரில் பல்வேறு நிகழ்ச்சிகள் நடைபெற உள்ளன. இதனால் பொதுமக்கள் மற்றும் விழாவிற்கு வரும் பார்வையாளர்களின் பாதுகாப்பு மற்றும் சட்டம் ஒழுங்கை கருத்தில் கொண்டு, இந்த ஆண்டு சாதிய அமைப்புகள் பிளக்ஸ் பேனர்கள் வைக்க முழுவதும் தடை விதித்துள்ளார். மேலும், மீறுபவர்கள் மற்றும் பிளக்ஸ் பேனர்கள் அச்சடிக்கும் நிறுவனங்கள் மீதும் சட்ட நடவடிக்கை இருக்கும் என திட்டவட்டமாக தெரிவித்துள்ளார்.

மேலும், விழாவை முன்னிட்டு தஞ்சாவூர் நகரின் முக்கிய பகுதிகளில் காவல்துறையினர் பாதுகாப்புப் பணியில் ஈடுபடுத்தப்பட உள்ளனர். போக்குவரத்து நெரிசலை கட்டுப்படுத்தவும், பொதுமக்களுக்கு இடையூறு ஏற்படாத வகையிலும் கூடுதல் கண்காணிப்பு மேற்கொள்ளப்பட உள்ளது.

சதய விழாவையொட்டி தஞ்சாவூர் மாநகரில் 700-க்கும் மேற்பட்ட காவலர்கள் பாதுகாப்புப் பணியில் ஈடுபடுத்தப்பட உள்ளதாக தெரிவிக்கப்பட்டுள்ளது. முக்கிய இடங்களில் காவல்துறையினர் நிறுத்தப்பட்டு, விழா நடைபெறும் பகுதிகளில் தீவிர கண்காணிப்பு மேற்கொள்ளப்பட உள்ளது.மேலும், போக்குவரத்து மற்றும் பாதுகாப்பு பணிகளுக்காக சிறப்பு ஏற்பாடுகள் செய்யப்பட்டுள்ளன. விழாவிற்கு வருகை தரும் பொதுமக்கள் மற்றும் பார்வையாளர்கள் காவல்துறையின் அறிவுறுத்தல்களை பின்பற்றி ஒத்துழைக்க வேண்டும் என கேட்டுக்கொள்ளப்பட்டுள்ளது.

சதய விழா நடைபெறும் நாட்களில் சட்டம்-ஒழுங்கு பிரச்சினைகள் ஏற்படாத வகையில் அனைத்து முன்னெச்சரிக்கை நடவடிக்கைகளும் மேற்கொள்ளப்பட்டுள்ளதாக காவல்துறை தெரிவித்துள்ளது என தஞ்சாவூர் மாவட்ட காவல் கண்காணிப்பாளர் பத்திரிகையாளர் சந்திப்பில் தெரிவித்தார்.

முதல் முறையாக சாதிய அமைப்புகளுக்கு செக் வைக்கும் வகையில் இது போன்ற முன்னெடுப்பை மேற்கொண்டது மக்கள் மத்தியில் பெரும் வரவேற்பை பெற்றுள்ளது...

தஞ்சாவூர் மாவட்ட நிர்வாகத்தின் சீரிய நடவடிக்கை : முடங்கிய மருத்துவக் காப்பீட்டு அட்டைகள் மீண்டும் இயக்கம்

 

தஞ்சாவூர்:

தஞ்சாவூர் மாவட்டத்தில் கடந்த 19.06.2025 அன்று நடைபெற்ற ‘மக்களுடன் முதல்வர்’ சிறப்பு முகாமில் முதலமைச்சரின் விரிவான மருத்துவக் காப்பீட்டுத் திட்டத்திற்காகப் பதிவுசெய்து, தொழில்நுட்பக் கோளாறுகளால் முடங்கிக் கிடந்த 50-க்கும் மேற்பட்ட ஏழை விவசாயக் கூலித் தொழிலாளர்களின் காப்பீட்டு அட்டைகளை, மாவட்ட நிர்வாகம் உடனடியாகத் தலையிட்டு நேற்று (19.10.2026) வெற்றிகரமாகச் செயல்பாட்டுக்குக் கொண்டுவந்துள்ளது. பொதுமக்களின்  கோரிக்கையை ஏற்றுத் துரிதமாகச் செயல்பட்ட மாவட்ட நிர்வாகத்திற்கும், துறைசார் அதிகாரிகளுக்கும் அப்பகுதி மக்களும் சமூக ஆர்வலர்களும் தங்களது மனமார்ந்த பாராட்டுக்களைத் தெரிவித்துள்ளனர்.

சிக்கலும் உடனடித் தீர்வும்

முன்னதாக, மேற்கண்ட சிறப்பு முகாமில் பதிவு செய்த குறிப்பிட்ட சில ஏழை விவசாயக் கூலிகளுக்கு, திடீர் உடல்நலக் குறைவு ஏற்பட்டு மருத்துவமனைகளை நாடிய போது அவர்களது காப்பீட்டு அட்டைகள் முடங்கியிருப்பது தெரியவந்தது. இதனால் ஏழை எளிய மக்கள் அவசரச் சிகிச்சைகள் பெறுவதில் பெரும் சிரமத்தைச் சந்தித்து வந்தனர்.

இந்தத் துயரமான சூழல் ஊடகங்கள் மற்றும் பொதுநல அமைப்புகள் வாயிலாக மாவட்ட நிர்வாகத்தின் கவனத்திற்கு உடனடியாகக் 18.10.2026 அன்று கொண்டு செல்லப்பட்டது.

மாவட்ட நிர்வாகம் மற்றும் சுகாதாரத்துறையின் அதிரடி நடவடிக்கை

விவகாரத்தின் தீவிரத்தை உணர்ந்த தஞ்சாவூர் மாவட்ட நிர்வாகம், உடனடியாகச் சம்பந்தப்பட்ட துறைகளை முடுக்கி விட்டது. தஞ்சாவூர் மாவட்ட ஆட்சியர் அவர்களின் அறிவுறுத்தலின் பெயரில் இணை இயக்குநர் (சுகாதாரப் பணிகள்) மற்றும் திட்ட அலுவலர் (CMCHIS ) தலைமையிலான அதிகாரிகள் குழுவினர் உடனடியாகக் களமிறங்கி, முடங்கிக் கிடந்த அந்த 50-க்கும் மேற்பட்ட மனுக்களைத் தீவிரமாக ஆய்வு செய்தனர்.

தரவுப் பதிவேற்றத்தில் (Data Entry) ஏற்பட்ட தொழில்நுட்பத் தடையை உடனடியாகச் சரி செய்த அதிகாரிகள், நேற்று (19.10.2026) மாலைக்குள் அனைத்துக் காப்பீட்டு அட்டைகளையும் மீண்டும் முழுமையான செயல்பாட்டு நிலைக்குக் கொண்டு வந்தனர்.

குவியும் பாராட்டுக்கள்

அரசின் நலத்திட்டங்கள் ஏழை எளிய மக்களை எந்தவிதத் தடையுமின்றிச் சென்றடைய வேண்டும் என்ற நோக்கில், மக்களின் கோரிக்கையை உடனுக்குடன் பரிசீலித்துச் செயல்பட்ட மாவட்ட ஆட்சியர், திட்ட அலுவலர் மற்றும் இணை இயக்குநர் (சுகாதாரப் பணிகள்) தலைமையிலான மருத்துவக் காப்பீட்டுத் துறை அதிகாரிகளின் இந்தச் சீரிய மற்றும் விரைவான நடவடிக்கைக்குப் பொதுமக்கள் மத்தியில் பெரும் வரவேற்பு கிடைத்துள்ளது.

துரிதமாகச் செயல்பட்டு ஏழை விவசாயக் கூலிகளின் இன்னல்களைத் தீர்த்து வைத்த தஞ்சாவூர் மாவட்ட நிர்வாகத்தின் இந்தச் செயல், அரசு அதிகாரிகளின் மக்கள் சேனைக்கு மற்றுமொரு சிறந்த எடுத்துக்காட்டாக அமைந்துள்ளது.

தஞ்சையில் நிர்வாக சொதப்பலால் காரணமின்றி முடக்கப்பட்டுள்ள மருத்துவ காப்பீடுகள்... தவிக்கும் ஏழை மக்கள்!

 

ஏழை எளிய கிராமப்புற மக்களுக்கும், விவசாய கூலித் தொழிலாளர்களுக்கும் பெரும் பாதுகாப்பாக விளங்கி வந்த 'முதலமைச்சரின் விரிவான மருத்துவக் காப்பீட்டுத் திட்டம்' (CMCHIS) பல இடங்களில் புதுப்பிக்கப்படாமலும், காப்பீட்டு அட்டைகள் முடக்கப்பட்டு உள்ளதால் விபத்து மற்றும் அவசர காலங்களில் ஏழை மக்கள் கடுமையாகப் பாதிக்கப்படுகின்றனர்.

திடீர் உடல்நலக்குறைவு அல்லது பெரிய அளவிலான அறுவை சிகிச்சைகளுக்காகத் தனியார் மற்றும் அரசு அங்கீகரிக்கப்பட்ட மருத்துவமனைகளை நாடும் விவசாய தொழிலாளர்களுக்கு, "உங்கள் காப்பீட்டு அட்டை செல்லுபடியாகும் நிலையில் இல்லை" அல்லது "செயலிழந்துவிட்டது" என்று கூறி சிகிச்சை மறுக்கப்படும் சம்பவங்கள் தற்போது தஞ்சாவூர் மாவட்டத்தில் தற்போது அதிகரித்து வருகின்றன.

கடந்த 19.06.2025 அன்று பேராவூரணி வட்டம், ஊமத்தநாடு DG.L திருமண மகாலில் நடைபெற்ற 'மக்களுடன் முதல்வர்' சிறப்பு முகாமில் முதலமைச்சரின் விரிவான மருத்துவக் காப்பீட்டுத் திட்டத்திற்காகப் பதிவுசெய்த 50-க்கும் மேற்பட்ட ஏழை விவசாயக் கூலித் தொழிலாளர்களின் காப்பீட்டு அட்டைகள் திடீரென முடக்கப்பட்டுள்ள சம்பவம் அப்பகுதியில் பெரும் அதிர்ச்சியையும் கொந்தளிப்பையும் ஏற்படுத்தியுள்ளது.

ஏற்கனவே தினசரி கூலி வேலையை மட்டுமே நம்பி வாழும் ஏழை குடும்பங்கள், மருத்துவமனைகளின் இந்த பதிலால் செய்வதறியாது திகைத்து நிற்கின்றனர். கட்டணமில்லா அவசர சிகிச்சை பெறுவதற்காக வழங்கப்பட்ட திட்டம், இப்போது நடைமுறையில் முடங்கி நிற்பதால் பொதுமக்கள் கடன் வாங்கி சிகிச்சை பெற வேண்டிய அவல நிலைக்குத் தள்ளப்பட்டுள்ளனர்.

குறிப்பிட்ட பாதிக்கப்பட்ட நபர்கள் அனைவரும் ஏழை விவசாய கூலி தொழிலாளர்கள் என்பது குறிப்பிடத்தக்கது. அரசு நடத்தும் சிறப்பு முகாம்களிலேயே இதுபோன்று தவறுகள் நடந்திருப்பது அப்பகுதியில் தற்போது பெரும் பேசு பொருளாகி உள்ளது. 

சமீபத்தில் வாகன விபத்தில் தலை மற்றும் முகத்தில் காயமடைந்த மரக்காவலசை கிராமத்தை சேர்ந்த திரு சுப்பிரமணியன் ( வயது 42 ) விவசாய கூலி தொழிலாளி ஒருவர், அவசர சிகிச்சைக்காக புதுக்கோட்டை அரசு மருத்துவக் கல்லூரி மருத்துவமனையில் சிகிச்சைக்காக சென்றபோதுதான் இந்த உண்மை தெரியவந்துளது. அவரது குடும்ப அட்டையில் முதலமைச்சரின் விரிவான காப்பீடு திட்டம் பதிவு செய்யப்பட்டுள்ளது ஆனால் பயன்படுத்த இயலாத வகையில் முடக்கம் செய்யப்பட்டுள்ளது. 

குடும்ப அட்டையில் காப்பீடு பதிவு செய்யப்படாமல் இருந்தால் உடனடியாக பதிவு செய்து சிகிச்சை பெறலாம். ஆனால், காப்பீடு பதிவு செய்யப்பட்டு முடக்கப்பட்ட நிலையில் இருக்கும் பட்சத்தில் அதனை மேல்முறையீடு செய்து அதற்கான தீர்வு எட்டப்படுவதற்கு குறைந்தபட்சம் 20 நாட்கள் ஆகும். இதனால் உடனடியாக மருத்துவ சிகிச்சை பெறுவதில் மிகப்பெரிய சிக்கல் ஏற்படுகிறது.

ஒரே நாளில் ஒரே முகாமில் பதிவு செய்த குறிப்பிட்ட இந்த 50 க்கும் மேற்பட்ட நபர்களுக்கு மட்டும் அட்டை முடக்கப்பட்டிருப்பதன் மூலம், முகாமின் போது தரவுகளைப் பதிவேற்றம் செய்ததில் (Data Entry) ஏற்பட்ட பெரும் தொழில்நுட்ப பிழை அல்லது அதிகாரிகளின் அலட்சியமே இதற்குக் காரணம் எனச் சமூக ஆர்வலர்கள் குற்றம் சாட்டுகின்றனர்.

இந்த மிக முக்கியமான விவகாரத்தில் அரசு உடனடியாக தலையிட்டு 19.06.2025 முகாமில் பெறப்பட்ட 50-க்கும் மேற்பட்ட மனுக்களின் தற்போதைய நிலையை மாவட்ட நிர்வாகம் உடனடியாக ஆய்வு செய்து, இதற்குக் காரணமான தொழில்நுட்ப/நிர்வாகப் பிழைகளை சரிசெய்து முடக்கத்தை நீக்க உரிய நடவடிக்கை எடுக்க வேண்டும் என்றும், காப்பீட்டு அட்டைகள் முழுமையாகச் சரிசெய்யப்படும் வரை, பாதிக்கப்பட்ட 50 க்கும் மேற்பட்ட குடும்பங்களுக்கும் அவசர மருத்துவச் சிகிச்சையைப் பெற சிறப்பு அனுமதி வழங்கப்பட வேண்டும் என்றும் 'மக்களுடன் முதல்வர்' முகாமில் பதிவு செய்த அளித்த ஏழை விவசாயக் கூலிகளுக்குப் காப்பீட்டு பலன்கள் தடங்கலின்றி கிடைக்கச் செய்ய வேண்டும் என அப்பகுதி மக்கள் கோரிக்கை விடுத்துள்ளனர்...

தேர்தல் ஆணையத்திற்கு எதிராக உச்ச நீதிமன்றத்தில் எதிர்க்கட்சிகள் மனு!

 

டெல்லி பரபரப்பு: ஜனநாயகத்தின் மீதான தாக்குதலா?

தலைநகர் டெல்லியில் அரசியல் களம் மீண்டும் சூடுபிடித்துள்ளது! வாக்காளர் பட்டியல் சிறப்பு தீவிர திருத்தம் (SIR) தொடர்பான தேர்தல் ஆணையத்தின் செயல்பாடுகளை எதிர்த்து, காங்கிரஸ் தலைவர் ராகுல் காந்தி மற்றும் 10 எதிர்க்கட்சித் தலைவர்கள் இணைந்து உச்ச நீதிமன்றத்தின் கதவுகளைத் தட்டியுள்ளனர்.

அரசியலமைப்புச் சட்டத்தின் ஆன்மாவைக் காப்பாற்றவே இந்த சட்டப்போராட்டம் என எதிர்க்கட்சிகள் முழங்கி வருகின்றன.

வழக்கின் சாராம்சம் :

எதிர்க்கட்சிகள் தாக்கல் செய்துள்ள மனுவில் தேர்தல் ஆணையத்தின் செயல்பாடுகள் குறித்து பல அடுக்கடுக்கான கேள்விகளும் கோரிக்கைகளும் முன் வைக்கப்பட்டுள்ளன.

1. ஜூன் 24, 2025 அன்று சிறப்பு தீவிர திருத்தப் பணிகளைத் தொடங்க எடுக்கப்பட்ட முடிவு உட்பட, தேர்தல் ஆணையத்தின் அனைத்து அதிகாரப்பூர்வ கோப்புகள், கூட்டக்குறிப்புகள் (Minutes), எதிர்ப்புகள் மற்றும் ECINET, ERONET அமைப்புகளின் அணுகல் பதிவுகளை (Access logs) வெளிப்படையாக வெளியிட வேண்டும்.
2. அரசியலமைப்புச் சட்டத்தின் 324-வது பிரிவு, 2023-ஆம் ஆண்டு தேர்தல் ஆணையச் சட்டம் மற்றும் வரலாற்றுச் சிறப்புமிக்க டி.என். சேஷன் எதிர் இந்திய யூனியன் வழக்கின் தீர்ப்பு ஆகியவற்றுக்கு ஏற்றவாறுதான் முடிவுகள் எடுக்கப்பட்டதா என்பதை நீதித்துறை தீர ஆராய வேண்டும்

"முறையான அறிவிப்பும், நியாயமான விசாரணைக்கான வாய்ப்பும் தராமல் எந்தவொரு குடிமகனின் பெயரையும் வாக்காளர் பட்டியலிலிருந்து நீக்கக் கூடாது!"

என்பதே மனுவின் முக்கிய கோரிக்கையாக உள்ளது.

வழக்கில் நீதிமன்றத்தின் முன் வைக்கப்பட்டுள்ள கோரிக்கைகள் :

1. நீக்கப்பட்ட வாக்காளர்களின் பெயர், மக்கள்தொகை விவரங்கள் மற்றும் நீக்கத்திற்கான காரணங்களை வாக்குச்சாவடி வாரியாக வெளிப்படையாகப் பிரசுரிக்க வேண்டும்.
2. வாக்காளர் தரவுத்தளங்களில் (ECINET & ERONET) செய்யப்பட்டுள்ள மாற்றங்கள் மற்றும் நீக்கங்களை ஆய்வு செய்ய, ஓய்வுபெற்ற உச்ச நீதிமன்ற நீதிபதி தலைமையில் சுயாதீனக் குழு அமைக்கப்பட வேண்டும்.
3. வழக்கு விசாரணை நிலுவையில் இருக்கும் வரை, தற்போது நடைபெற்று வரும் சிறப்பு தீவிர திருத்தப் பணிகளுக்கு உடனடியாக இடைக்காலத் தடை விதிக்க வேண்டும்.

சட்டத்தின்படி தேர்தல் ஆணையத்தின் ஒவ்வொரு முடிவும் முறையாகப் பதிவு செய்யப்பட வேண்டும் என்றும், தன்னிச்சையாக எந்தவொரு வாக்காளரின் உரிமையையும் பறிக்கக் கூடாது என்றும் மனுவில் மிக அழுத்தமாகக் குறிப்பிடப்பட்டுள்ளது.

உச்ச நீதிமன்றத்தின் இந்த வழக்கின் விசாரணை, நாட்டின் தேர்தல் நடைமுறையில் மிகப்பெரிய மாற்றங்களை ஏற்படுத்துமா என்பதைப் பொறுத்திருந்துதான் பார்க்க வேண்டும்!

தமிழக வெற்றிக் கழகத்தின் நிலைப்பாடு : 

கூட்டணியின் தேசியத் தலைவர்கள் அனைவரும் ஓரணியில் திரண்டு, “வாக்காளர்களின் உரிமையைப் பறிக்காதே!” என்று உச்ச நீதிமன்றக் கதவுகளைத் தட்டிக்கொண்டிருக்கும் வேளையில், தமிழக அரசியல் வட்டாரத்தில் ஒரு கேள்வி மட்டும் மிக உரக்கக் கேட்கத் தொடங்கியுள்ளது.

தேர்தல் ஆணையத்தின் செயல்பாடுகளை எதிர்த்து எதிர்க்கட்சிகள் தொடுத்துள்ள இந்த வழக்கு ஒருபுறம் தீவிரமடைந்து வர, மற்றொருபுறம் தமிழக வெற்றிக் கழகத்தின் இந்த அமைதி அல்லது தனித்தன்மை வாய்ந்த நகர்வு, தமிழ்நாட்டு அரசியலில் ஒரு புதிய விவாதப் பொருளாக மாறியுள்ளது.

கூட்டணித் தர்மமா? அல்லது தனித்துவ அரசியலா? உச்ச நீதிமன்றத் தீர்ப்பும், தவெகவின் அடுத்தகட்ட அரசியல் நடவடிக்கைகளுமே இதற்கான தெளிவான பதிலைத் தரும்!